ബിവറേജസ് കോർപ്പറേഷൻറെ ചില്ലറ വിൽപ്പന മദ്യശാല അടച്ചുപൂട്ടണം മദ്യ വിരുദ്ധ ജനകീയ സമര സമിതി   Leave a comment

 

.മുളന്തുരുത്തി: 01.04.2017,

മുളന്തുരുത്തിയിൽ പുതുതായി തുറന്ന ബിവറേജസ് കോർപ്പറേഷൻറെ ചില്ലറ വിൽപ്പന മദ്യശാല അടച്ചുപൂട്ടണമെന്ന് മദ്യ വിരുദ്ധ ജനകീയ സമര സമിതി മുളന്തുരുത്തി മേഖല കമ്മിറ്റി സംസ്ഥാന സർക്കാരിനോട് ആവശ്യപ്പെട്ടു.

ശക്തമായ മദ്യവിരുദ്ധ പ്രവർത്തനം നടന്നുവരുന്ന മേഖലയാണ് മുളന്തുരുത്തി. കഴിഞ്ഞ സർക്കാരിന്റെ കാലത്ത് മുളന്തുരുത്തിയിൽ വർഷങ്ങളായി പ്രവർത്തിച്ചു വന്നിരുന്ന ബിവറേജസ് മദ്യ വില്പനശാലയും ബാറും അടച്ചുപൂട്ടുകയുണ്ടായി.അതുവഴി സാധാരണ ജനങ്ങളുടെ ജീവിതത്തിൽ,പ്രത്യേകിച്ച് സ്ത്രീകളുടെയും കുട്ടികളുടെയും ജീവിതത്തിൽ ഗുണപരമായ വ്യത്യാസങ്ങളാണ് ഉണ്ടായത്. മദ്യ ലഭ്യത കുറഞ്ഞതിനാൽ മുളന്തുരുത്തി പ്രദേശത്തു പലരും മദ്യപാനം കുറയ്ക്കുകയോ നിർത്തുകയോചെയ്തു. ഇത്‌ കുടുംബങ്ങളിൽ സ്വസ്ഥതയും സാമ്പത്തിക ഭദ്രതയും ഉണ്ടാകാൻ ഇടയാക്കി.ചെറുപ്പക്കാരിലും മദ്യപാന ശീലം കുറഞ്ഞുവന്നു.മുളന്തുരുത്തി മേഖലയിൽ താരതമ്യേന നിലനിൽക്കുന്ന സമാധാന അന്തരീക്ഷത്തിനു ഒരു പ്രധാനകാരണം മദ്യശാലകൾ അടച്ചുപൂട്ടിയതാണ്.
ബിവറേജസിൻറെ വിൽപ്പന കേന്ദ്രം വീണ്ടും മുളന്തുരുത്തിയിൽ തുറന്നത് സംസ്ഥാന സർക്കാരിന്റെ ജനദ്രോഹ മദ്യ നയത്തിന്റെ ഭാഗമാണെന്നും എല്ലാം ശരിയാക്കാമെന്നു വാഗ്ദാനം നൽകി അധികാരത്തിൽ വന്ന എൽ.ഡി.എഫ്.സർക്കാർ പടിപടിയായി ശരിയാക്കുന്നത് അടച്ചുപൂട്ടപ്പെട്ട മദ്യ ശാലകൾ ഒന്നൊന്നായി വീണ്ടും തുറന്നു പ്രവർത്തിപ്പിച്ചുകൊണ്ടാണെന്നും സമിതി കുറ്റപ്പെടുത്തി. വില്പനകേന്ദ്രം വീണ്ടും തുറന്ന നടപടിയോട് മുളന്തുരുത്തി ഗ്രാമ പഞ്ചായത്ത് ഭരണസമിതിയുടെ നിലപാടെന്തെന്നു വ്യക്തമാക്കണമെന്നും സമിതി ആവശ്യപ്പെട്ടു.

Posted April 2, 2017 by EKMSUCI in MVJSS, News, PEOPLE'S MOVEMENT, Recent

ഭഗത്‌സിംഗ് രക്തസാക്ഷിദിനാചരണം അത്താണിയില്‍   Leave a comment

ഇന്ത്യന്‍ സ്വാതന്ത്ര്യസമരത്തിലെ അനശ്വര രക്തസാക്ഷി ഭഗത്‌സിംഗിനെ അനുസ്മരിച്ചുകൊണ്ട് എഐഡിവൈഒ എറണാകുളം ജില്ലാ കമ്മിറ്റി നെടുമ്പാശ്ശേരി അത്താണിയില്‍ സംഘടിപ്പിച്ച സമ്മേളനത്തില്‍ എഐഡിവൈഒ സംസ്ഥാന സെക്രട്ടറി സഖാവ് ഇ.വി.പ്രകാശ് മുഖ്യപ്രസംഗം നടത്തുന്നു. ജില്ലാസെക്രട്ടറി കെ.പി.സാല്‍വിന്‍ അദ്ധ്യക്ഷത വഹിച്ച സമ്മേളനത്തില്‍ എഐഎംഎസ്എസ് ജില്ലാ സെക്രട്ടറി സഖാവ് കെ.കെ.ശോഭ, എഐഡിവൈഒ ജില്ലാ നേതാക്കളായ സഖാക്കള്‍ കെ.വി.സന്തോഷ്, രാഹുല്‍ രാജ് എന്നിവരും പ്രസംഗിച്ചു.

Posted March 24, 2017 by EKMSUCI in AIDYO, Frontal Organisations, News, Recent

മിഷേലിന്റെ മരണത്തിലുള്ള പോലീസ് വെളുപ്പെടുത്തലിലുള്ള ദുരൂഹതയിലും സത്യസന്ധമായ അന്വേഷണത്തിലൂടെ യഥാർത്ഥ വസ്തുത പുറത്തു കൊണ്ടുവരുവാൻ ആവശ്യപ്പെട്ടുകൊണ്ടും സ്ത്രീ സുരക്ഷാസമിതി മിഷേലിന്റെ ജന്മനാടായ പിറവം ഇരപ്പാംകുഴി ജംഗ്ഷനിൽ സംഘടിപ്പിച്ച പ്രതിഷേധ കൂട്ടായ്മ.   Leave a comment

പ്രതിഷേധ കൂട്ടായ്മയിൽ എഐഎംഎസ്എസ് ജില്ല സെക്രട്ടറി കെ.കെ.ശോഭ പ്രസംഗിക്കുന്നു

മിഷേൽ ഷാജിയുടെ മരണത്തിൽ പോലീസ് വെളുപ്പെടുത്തലുകളിൽ ദുരൂഹതകളുണ്ടെന്നും സത്യസന്ധവും ഊർജ്ജിതവുമായ അന്വേഷണത്തിലൂടെ യഥാർത്ഥ വസ്തുതകൾ പുറത്തു കൊണ്ടുവരണമെന്നും ആവശ്യപ്പെട്ട് മിഷേലിന്റെ ജന്മനാടായ പെരിയപ്പുറം ഇരപ്പാംകുഴി ജംഗ്ഷനിൽ സ്ത്രീ സുരക്ഷാസമിതി സംഘടിപ്പിച്ച പ്രതിഷേധ കൂട്ടായ്മയിൽ എഐഎംഎസ്എസ്(അഖിലേന്ത്യാ മഹിളാ സാംസ്‌കാരിക സംഘടന)  ജില്ല സെക്രട്ടറി കെ.കെ.ശോഭ പ്രസംഗിക്കുന്നു. സ്ത്രീ സുരക്ഷാസമിതി സംസ്ഥാന വൈസ് പ്രസിഡന്റ് ശ്രീമതി PK ശാന്തകുമാരി ഉൽഘാടനം ചെയ്തു . എൻ.ആർ.മോഹൻകുമാർ അദ്ധ്യക്ഷത വഹിച്ചു.കെ.ഒ.സുധീർ (എഐഡിവൈഒ  ജില്ലാ പ്രസിഡന്റ്), എം.കെ.ഉഷ (സ്ത്രീ സുരക്ഷാ സമിതി ജില്ലാ സെക്രട്ടറി ), TC രമണൻ, സാലി സെബാസ്റ്റ്യൻ, രാഗിണി ശശി, ടി സി കമല തുടങ്ങിയവരും സംസാരിച്ചു.

 

Posted March 18, 2017 by EKMSUCI in AIMSS, News, PEOPLE'S MOVEMENT, STREE SURAKSHA SAMITHI

സ്ത്രീകൾക്കും കുട്ടികൾക്കും നേരെയുള്ള അതിക്രമങ്ങൾക്കെതിരെ പ്രതിഷേധകൂട്ടായ്മ   Leave a comment

ganesh-sundaram-pinnanni-gayakan
എറണാകുളം, മാർച്ച് 3,

സ്ത്രീ സുരക്ഷാ സമിതിയുടെ നേതൃത്വത്തിൽ അതിക്രമങ്ങൾക്കെതിരെ പ്രതിഷേധകൂട്ടായ്മ സംഘടിപ്പിച്ചു. എറണാകുളം മേനകയിൽ നടന്ന പ്രതിഷേധ കൂട്ടായ്മയിൽ സാമൂഹ്യ-സാംസ്‌കാരിക രംഗങ്ങളിലെ പ്രമുഖർ പങ്കെടുത്തു. ധാർമ്മികതയുടെയും നൈതികതയുടെയും പാഠങ്ങൾ പുതിയ തലമുറയ്ക്ക് പകർന്നുനൽകാൻ വിദ്യാഭ്യാസ സംവിധാനത്തിനോ, കുടുംബ-സാമൂഹ്യ സംവിധാനത്തിനോ കഴിയുന്നില്ലെന്ന ഗൗരവാവഹമായ പ്രശ്‌നത്തെയാണ് നാം അഭിമുഖീകരിക്കുന്നതെന്ന് കൂട്ടായ്മയിൽ സംസാരിച്ച പ്രശസ്ത പിന്നണിഗായകൻ ഗണേഷ് സുന്ദരം അഭിപ്രായപ്പെട്ടു.
ഒന്നിനുപിറകെ ഒന്നെന്ന നിലയിൽ സ്ത്രീകൾക്കും കുട്ടികൾക്കും നേരെ നടക്കുന്ന അതിക്രമങ്ങൾ രാഷ്ട്രീയസംവിധാനത്തിന്റെ പാളിച്ചയാണ് വ്യക്തമാക്കുന്നതെന്ന് ജനകീയപ്രതിരോധ സമിതി ജില്ലാ പ്രസിഡന്റ് പ്രൊഫ.കെ.അരവിന്ദാക്ഷൻ ഉദ്ഘാടന പ്രസംഗത്തിൽ പറഞ്ഞു.

കൂട്ടായ പ്രതിരോധമാണ് ഒരേയൊരു പോംവഴിയെന്ന് കൂട്ടായ്മയിൽ അദ്ധ്യക്ഷത വഹിച്ച സ്ത്രീ സുരക്ഷാ സമിതിയുടെ പ്രസിഡന്റ് ഡോ.വിൻസന്റ് മാളിയേക്കൽ വ്യക്തമാക്കി. സർക്കാരുകൾ സ്ത്രീ സുരക്ഷയ്‌ക്കെന്നു പറഞ്ഞു മാറ്റിവയ്ക്കുന്ന വൻതുകകൾ അടിസ്ഥാനരഹിതരമായി ചെലവഴിക്കപ്പെടുന്നുവെന്നതല്ലാതെ പ്രശ്‌നത്തിനുപരിഹാരമുണ്ടാകുന്നില്ല. സമൂഹത്തിലെ പ്രബലരും പ്രമുഖരുമാണ് പലപ്പോഴും പ്രതിസ്ഥാനത്ത് നിൽക്കുന്നതെന്നും പ്രമാദമായ കേസ്സുകളിൽപോലും പ്രതികൾ ശിക്ഷിക്കപ്പെടുന്നില്ലയെന്നതും അതിക്രമങ്ങൾ വർദ്ധിക്കുന്നതിന് കാരണമാണെന്ന് മുഖ്യപ്രഭാഷണം നടത്തിയ അഖിലേന്ത്യാ മഹിളാ സാംസ്‌കാരിക സംഘടന സംസ്ഥാന സെക്രട്ടറി ഷൈല കെ.ജോൺ അഭിപ്രായപ്പെട്ടു.

സ്ത്രീ സുരക്ഷാ സമിതി സംസ്ഥാന സെക്രട്ടറി മിനി കെ.ഫിലിപ്പ്, പ്രശസ്ത നാടക സംവിധായകൻ അബ്ബാസ് പ്രതീക്ഷ, മദ്യവിരുദ്ധ ജനകീയ സമരസമിതി ജില്ലാ പ്രസിഡന്റ് കെ.കെ.ഗോപിനായർ, ജനകീയപ്രതിരോധ സമിതി സംസ്ഥാന സെക്രട്ടറി ടി.കെ.സുധീർകുമാർ, ഇന്ത്യൻ നേഴ്‌സസ് പേരന്റ്‌സ് അസോസിയേഷൻ കോ-ഓർഡിനേറ്റർ എൻ.ആർ.മോഹൻകുമാർ, സ്ത്രീ സുരക്ഷാ സമിതി ലീഗൽ സെൽ കൺവീനർ അഡ്വ.എം.എ.ബിന്ദു, എഐഎംഎസ്എസ് സംസ്ഥാന സെക്രട്ടേറിയറ്റംഗം കെ.ജെ.ഷീല, ജില്ലാ സെക്രട്ടറി കെ.കെ.ശോഭ, എം.കെ.ഉഷ, എഐഡിവൈഒ സംസ്ഥാന സെക്രട്ടേറിയറ്റംഗം ടി.ആർ.രാജിമോൾ തുടങ്ങിയവരും പ്രസംഗിച്ചു.

വല്ലാർപാടം പോലീസ് അതിക്രമം: ജൂഡീഷ്യൽ അന്വേഷണം വേണം – ജനകീയ കൂട്ടായ്മ   Leave a comment

 

ജനകീയ കൂട്ടായ്മയിൽ എസ്‌യുസിഐ(സി) ജില്ലാ സെക്രട്ടറി
സഖാവ് ടി.കെ.സുധീർകുമാർ പ്രസംഗിക്കുന്നു

വല്ലാർപാടത്ത് ബാലികയെ പീഡിപ്പിച്ച പ്രതിയെ അറസ്റ്റു ചെയ്യാത്തതിനെതിരെ ജനകീയ സമരസമിതി നടത്തിയ പ്രതിഷേധത്തിനുനേരെയുണ്ടായ പോലീസ് അതിക്രമത്തെക്കുറിച്ച് ജൂഡീഷ്യൽ അന്വേഷണം നടത്തണമെന്നാവശ്യപ്പെട്ട് ജനകീയപ്രതിരോധ സമിതി ജനകീയ കൂട്ടായ്മ സംഘടിപ്പിച്ചു. ഹൈക്കോടതി ജംഗ്ഷനിൽ നടന്ന കൂട്ടായ്മ ജില്ലാ പ്രസിഡന്റ് പ്രൊഫ.കെ.അരവിന്ദാക്ഷൻ ഉദ്ഘാടനം ചെയ്തു.
”സംഭവം പുറത്തറിഞ്ഞതിന് ശേഷം 18 ദിവസം കഴിഞ്ഞിട്ടും പ്രതിയെ അറസ്റ്റുചെയ്യാൻ തയ്യാറാവാത്ത സാഹചര്യത്തിൽ ജനങ്ങൾ നടത്തിയ പ്രതിഷേധത്തെ പോലീസിനെ ഉപയോഗിച്ച് അടിച്ചമർത്താൻ നടത്തിയ ശ്രമം പ്രതിഷേധകരമാണെന്ന് അദ്ദേഹം പറഞ്ഞു. കുഞ്ഞുകുട്ടികൾക്കുപോലും സുരക്ഷിതമല്ലാത്ത നാടായി കേരളം മാറുന്നത് ദൗർഭാഗ്യകരമാണ്. പ്രതികളെ ചൂണ്ടിക്കാണിച്ചുകൊടുത്താൽപോലും നടപടിയെടുക്കാൻ ഭരണാധികാരികൾ തയ്യാറാകാതിരിക്കുന്നത് ഇത്തരം സംഭവങ്ങളെ പ്രോത്സാഹിപ്പിക്കലാണ്. നിലനിൽക്കുന്ന നിയമങ്ങൾ പോലും നടപ്പിലാക്കാതെയും ജനകീയ പ്രതിഷേധത്തെ അടിച്ചമർത്തിയും സർക്കാർതന്നെ പ്രതിപട്ടികയിലാകുകയാണ് വല്ലാർപാടം സംഭവത്തിലൂടെ ഉണ്ടായിരിക്കുന്നത്”. സമരസമിതി നേതാക്കൾക്കെതിരെ ജാമ്യമില്ലാ വകുപ്പ് ചുമത്തി എടുത്തിരിക്കുന്ന കേസ്സ് പിൻവലിക്കണമെന്നും നാടിന് സ്വാഭാവികനീതി ഉറപ്പാക്കണ”മെന്നും അദ്ദേഹം ആവശ്യപ്പെട്ടു. ജില്ലാ സെക്രട്ടറി ഫ്രാൻസിസ് കളത്തുങ്കൽ അദ്ധ്യക്ഷത വഹിച്ചു. അഡ്വ.ഷെറി ജെ.തോമസ്, ടി.കെ.സുധീർകുമാർ, കെ.റജികുമാർ, ഏലൂർഗോപിനാഥ്, പി.എം.ദിനേശൻ, അഡ്വ.പഞ്ഞിമല ബാലകൃഷ്ണൻ, കെ.കെ.ശോഭ, വല്ലാർപാടം ജനകീയ സമരസമിതി കൺവീനർ ടി.എം.ജോസഫ്, റുബീന ബെന്നി, ജോണി ജോസഫ്, കെ.പി.സാൽവിൻ, ജമാൽ മഞ്ഞുമ്മൽ, സ്റ്റാൻലി മുളവുകാട്, ആൻണി മുളവുകാട് തുടങ്ങിയവർ പ്രസംഗിച്ചു.

വല്ലാര്‍പാടം പോലീസ് അതിക്രമം: വനിതകളുടെ പ്രതിഷേധം   Leave a comment

mss-ekm-vallarpadom

വല്ലാര്‍പാടത്ത് ബാലികയെ പീഡിപ്പിച്ച പ്രതിയെ ഉടന്‍ അറസ്റ്റുചെയ്യുക, പ്രതിഷേധിച്ച ജനക്കൂട്ടത്തിനുനേരെ നടന്ന പോലീസ് അതിക്രമത്തെക്കുറിച്ച് ജുഡീഷ്യല്‍ അന്വേഷണം നടത്തുക തുടങ്ങിയ ഡിമാന്റുകള്‍ ഉന്നയിച്ച് അഖിലേന്ത്യാ മഹിളാ സാംസ്‌കാരിക സംഘടന എറണാകുളം ജില്ലാ കമ്മിറ്റിയുടെ നേതൃത്വത്തില്‍ ഹൈക്കോടതി ജംഗ്ഷനില്‍ പ്രതിഷേധയോഗം ചേര്‍ന്നു. പ്രതിഷേധ യോഗം സംസ്ഥാന സെക്രട്ടേറിയറ്റംഗം കെ.ജെ.ഷീല ഉദ്ഘാടനം ചെയ്തു.

മതിയായ അന്വേഷണം നടത്തി സമയബന്ധിതമായി നടപടി സ്വീകരിക്കാന്‍ അധികാരികള്‍ തയ്യാറാവാത്തതാണ് സ്ത്രീകള്‍ക്കും കുഞ്ഞുങ്ങള്‍ക്കുമെതിരെ ദിനംതോറും പെരുകിവരുന്ന അതിക്രമങ്ങള്‍ക്ക് പ്രധാന കാരണമെന്ന് അവര്‍ പറഞ്ഞു. പെണ്‍വാണിഭ മാഫിയ-രാഷ്ട്രീയ കൂട്ടുകെട്ടാണ് പലകേസ്സുകളിലും അന്വേഷണം മുമ്പോട്ടുപോകാതിരിക്കുന്നതിന് കാരണം. സാമൂഹ്യ-സാംസ്‌കാരിക അന്തരീക്ഷം മലിമസമായ ഇന്നത്തെ സാഹചര്യത്തില്‍ സര്‍ക്കാരുകളുടെ ഈ നിഷ്‌ക്രിയത്വത്തിനെതിരെ ജനകീയൈക്യം ശക്തിപ്പെടുത്തിയെടുക്കുകയെന്ന ഉത്തരവാദിത്തമാണ് നേരായി ചിന്തിക്കുന്ന സ്ത്രീയുടെയും പുരുഷന്റെയും മുമ്പിലുള്ളത്. മദ്യത്തിന്റെയും മയക്കുമരുന്നിന്റെയും അശ്ലീലതയുടെയും വ്യാപനത്തിനും സെക്‌സ് ടൂറിസത്തിനെ പ്രോത്സാഹിപ്പിക്കുന്ന സര്‍ക്കാര്‍ നയത്തിനുമെതിരെ ശക്തമായ പോരാട്ടമാണ് തലമുറകള്‍ക്കുവേണ്ടി നാം ചെയ്യേണ്ടതെന്നും അവര്‍ ഉദ്ഘാടന പ്രസംഗത്തില്‍ സൂചിപ്പിച്ചു.

സംസ്ഥാന സെക്രട്ടേറിയറ്റംഗം എം.കെ.ഉഷ അദ്ധ്യക്ഷത വഹിച്ചു. ജില്ലാ സെക്രട്ടറി കെ.കെ.ശോഭ, ജില്ലാ വൈസ്പ്രസിഡന്റുമാരായ എം.പി.സുധ, രാജി രാജേന്ദ്രന്‍, വി.പി.ബിന്ദു, ജോയിന്റ് സെക്രട്ടറിമാരായ ലൈലാ റഷീദ്, എ.ജി.ലസിത, എഐഡിവൈഒ ജില്ലാ സമിതിയംഗം എ.റജീന, എഐഡിഎസ്ഒ ജില്ലാ പ്രസിഡന്റ് രശ്മി രവി തുടങ്ങിയവര്‍ പ്രതിഷേധയോഗത്തെ അഭിസംബോധന ചെയ്തു

Posted February 20, 2017 by EKMSUCI in AIMSS, Frontal Organisations, News, Recent

വല്ലാർപാടം ബാലികാപീഡനവും പോലീസ് അതിക്രമവും- കുറ്റവാളികളെ തുറുങ്കിലടക്കുക   Leave a comment

കൊച്ചി. ഫെബ്രുവരി 19.

മൂന്നാം ക്ലാസ് വിദ്യാർത്ഥിനിയെ തുടർച്ചയായി പീഡിപ്പിച്ച സി.പി.എം നേതാവിനെ ഉടനടി അറസ്റ്റു ചെയ്ത് മാതൃകാപരമായി ശിക്ഷിക്കണമെന്ന് ഇന്നിവിടെ ചേർന്ന എസ്.യു.സി.ഐ(കമ്മ്യൂണിസ്റ്റ്) കൊച്ചിൻ സിറ്റി ലോക്കൽ കമ്മിറ്റി ആവശ്യപ്പെട്ടു.

സംഭവം നടന്ന് രണ്ടാഴ്ച പിന്നിട്ടിട്ടും തിരിച്ചറിഞ്ഞ പ്രതിയെ സംരക്ഷിക്കുന്ന പോലീസ്, അതിനെതിരെ സംഘടിച്ചു സമരം ചെയ്ത സ്ത്രീകളും കുട്ടികളുമടക്ക മുള്ള നാട്ടുകാരെ തല്ലിച്ചതച്ച നടപടിയെ യോഗം അപലപിച്ചു.

പ്രതിയെ സംരക്ഷിക്കുകയും നാട്ടുകാരെ വിവേചനരഹിതമായി ആക്രമിക്കുകയും ചെയ്ത പോലീസുകാരെ സസ്‌പെന്റുചെയ്ത് ജുഡീഷ്യൽ അന്വേഷണം നടത്തണമെന്ന് യോഗത്തിൽ സന്നിഹിതനായിരുന്ന എസ്.യു.സി.ഐ (കമ്മ്യൂണിസ്റ്റ്) ജില്ലാ സെക്രട്ടറി ടി.കെ. സുധീർകുമാർ പ്രസ്താവിച്ചു.

Posted February 20, 2017 by EKMSUCI in News, Recent, SUCI NEWS

%d bloggers like this: